أوت كُرهِٔ أرضده درت يوز بيڭ نوعلرى ذىحياتدن خلق ايدن، حتّى أڭ عادى و متعفّن مادّه‌لردن ذىروحلرى چوقلقله يارادان و هر طرفى اونلرله شنلنديرن و معجزاتِ صنعتنه قارشى، اونلره ديللريله "ما شاء اللّٰه، بارك اللّٰه، سبحان اللّٰه" ديديرن و إحساناتِ رحمتنه مقابل "اَلْحَمْدُ ِللّٰه، وَالشُّكْرُ ِللّٰهِ، اَللّٰهُ اَكْبَرُ" او حيوانجقلره سويلتديرن بر قديرِ ذو الجلال والجمال، ألبته، بِلا شك ولا شبهه، قوجه سماواته مناسب، عصيانسز و دائما عبوديتده اولان سكنه‌لرى و روحانيلرى ياراتمش، سماواتى شنلنديرمش، بوش بيراقمامش. و حيواناتڭ طائفه‌لرندن پك چوق زياده آيرى آيرى نوعلرى مَلكلردن ايجاد ايتمش كه، بر قسمى كوچوجك اولارق ياغمور و قار قطره‌لرينه بينوب صنعت و رحمتِ إلٰهيه‌يى كندى ديللريله آلقيشلايورلر· بر قسمى، برر سيّار ييلديزلره بينوب فضاىِ كائناتده سياحت ايچنده عظمت و عزّت و حشمتِ ربوبيته قارشى تكبير و تهليل ايله عبوديتلرينى عالمه إعلان ايدييورلر. أوت زمانِ آدمدن بَرى بتون سماوى كتابلر و دينلر، مَلكلرڭ وجودلرينه و عبوديتلرينه إتّفاقلرى و بتون عصرلرده مَلكلر ايله قونوشمالر و محاوره‌لر، كثرتلى تواتر ايله إنسانلر ايچنده وقوع بولديغنى نقل و روايتلرى ايسه· گورمديگمز آمريقا إنسانلرينڭ وجودلرى گبى مَلكلرڭ وجودلرينى و بزمله علاقه‌دار اولدقلرينى قطعى إثبات ايدر.

ايشته شيمدى گل، ايمان نوريله بو كلّى ايكنجى ميوه‌يه باق و طات· ناصل كائناتى باشدن باشه شنلنديروب، گوزللشديروب بر مسجدِ أكبره و بيوك بر عبادتخانه‌يه چويرييور. و فن و فلسفه‌نڭ صوغوق، حياتسز، ظلمتلى، دهشتلى گوسترمه‌لرينه مقابل· حياتلى، شعورلى، ايشيقلى، انسيتلى، طاتلى بر كائنات گوستره‌رك باقى حياتڭ بر جلوهِٔ لذّتنى أهلِ ايمانه درجه‌سنه گوره دنياده دخى طاتديرر.